Tryggleika til føroyska Merkið

Tryggingarfelagið: Tryggingarfelagið Føroyar hevur í dag givið enn eina forkunnuga gávu til allar føroyingar.

Í ár eru 70 ár síðan føroyska Merkið varð viðurkent sum tjóðarflagg føroyinga. Eisini eru tað 70 ár síðan føroyingar tóku seg saman um at stovna tryggingarvirksemið hjá Tryggingarfelagnum Føroyum. Tryggingarfelagið Føroyar hevur tí avgjørt at geva eina gávu, ið skal gera fyrsta, uppruna føroyska Merkið tryggari.

Gunnar í Liða, forstjóri: ”Tað er ómøguligt at seta eina tryggingarupphædd á okkara fyrsta, uppruna føroyska flagg - Merkið. Hetta er eittans og kann ikki endurnýggjast. Samstundis er Merkið okkara tjóðarbúmerki, og hevur tí ein týðandi leiklut í okkara samfelagi og samleika. Tryggingarfelagið Føroyar hevur til endamáls at skapa tryggleika. Tí varð avgjørt, at vit, í sambandi við 70 ára haldið, vildu geva eina gávu til allar føroyingar, ið kundi gera Merkið tryggari.”

Merkið hevur hingið nærum óvart í Fámjins Kirkju í nógv áratíggir. Hetta verður nú broytt við gávuni, sum er eitt eldtrygt glasskáp, ið tryggjar fyrsta, uppruna Merkið ímóti eldi, stuldri v.m.

Andras Mortensen, landsantikvarur: ”Fyrsta, føroyska Merkið hevur hingið í vanligari glas myndarammu í kirkjuni í Fámjin, hetta hevur ikki verið nøktandi við atliti til tryggleikan hjá Merkinum. Við gávuni er fyrsta Merkið nú tryggjað fram í tíðina. Talan er um eitt tað mest framkomna eldtrygga glasskápið í Føroyum.”

Gávan varð handað í Fámjins Kirkju í dag. Byrjað varð við hátíðarhaldi í Kirkjuni har Gunnar í Liða, forstjóri í Tryggingarfelagnum Føroyum, Helena Dam á Neystabø, mentamálaráðharri, Jónsvein Bech, prestur og Andras Mortensen, landsantikvarur søgdu nøkur orð. Eisini varð solosangur og felagssangur á skránni. Eftir hátíðarhaldið varð hildið áfram við almennari móttøku í bygdarhúsinum í Fámjin. Nógv fólk møttu.

Jógvan Fríðrikson, bispur: ”Vit fegnast um, at hava fingið tílíka stórfingna gávu. Tað er gleðiligt at vit hava føroyskar fyritøkur, ið velja at geva aftur til samfelagið. Nýggja glasskápið gevur munandi betri umstøður til fyrsta tjóðarflagg okkara, ið hongur í kirkjuni í Fámjin.”

Aftur