Tríggjar broytingar á føroyska liðnum

FSF: Brian Kerr hevur nú sett liðið, sum skal royna seg móti Italia í kvøld. Liðið er nakað broytt frá dystinum móti Serbia, tí venjarin hevur gjørt av at seta tríggjar nýggjar manns á vøllin.

Í verjuni kemur Egil á Bø á liðið fyri Jónas Tór Næs. Hetta hevur við sær, at Jóhan Troest Davidsen fer at leika á høgra bakki í kvøld, meðan Atli Gregersen og Egil á Bø verða í miðverjuni. Hendrik Rubeksen er á vinstra bakki.

Tvær broytingar eru á miðvøllinum. Bogi Løkin kemur inn fyri Christian Holst, meðan Christian R. Mouritsen loysir Daniel Udsen av. Christian R. Mouritsen meiddi sær fótin undir fyrstu venjingini í Italia, men skaðin var ikki álvarsamur, og hann er tí tøkur til dystin. Símun Samuelsen hevur eisini verið tarnaður av skaða, men hann er eisini komin fyri seg og byrjar móti Italia. Hinir báðir menninir á miðjuni eru Jann Ingi Petersen og Fróði Benjaminsen, liðformaður.

Ungi toftamaðurin, Jóan Símun Edmundsson, verður einsamallur áleypari í dystinum í kvøld, sum byrjar kl. 19.50.

Føroyska liðið til dystin móti Italia er tí:
1. Gunnar Nielsen - 6. Jóhan Troest Davidsen, 4. Atli Gregersen, 5. Egil á Bø, 3. Hendrik Rubeksen - 2. Bogi Løkin, 7. Fróði Benjaminsen (L), 8. Jann Ingi Petersen, 9. Christian R. Mouritsen, 10. Símun Samuelsen - 11. Jóan Símun Edmundsson

Á bonkinum:
16. Tórður Thomsen, 12. Jónas Tór Næs, 13. Bartal Eliasen, 14. Daniel Udsen, 15. Christian Holst, 17. Arnbjørn Hansen, 18. Jústinus Hansen

Aftur