Tilfeingisgjaldið er longu farið til hoyringar hjá ABC

Løgmaður segði í útvarpinum í kvøld, at hann væntaði, at eitt orðaskifti um tilfeingisgjald fór at taka seg upp teir næstu mánaðirnar. Ein fekk varðhugan av, at hetta bara snúði seg um makrelveiðu. Eftir øllum at døma veit løgmaður meira enn hann letst.

Góðar keldur í vinnulívinum siga nú við Vágaportalin, at eitt fullfíggjað generelt lógaruppskot um tilfeingisgjald longu er farið til hoyringar hjá flokkunum, sum manna ABC-samgonguna.

Tá fíggjarmálaráðharrin legði uppskotið um fíggjarkarmarnar fram á ting í vár, var greitt, at ein stórur partur av meirinntøkunum, fyri at fáa kabalina at ganga upp, skuldi koma frá einum nýggjum tilfeingisgjaldi.

Ábendingar hava síðani verið um, at samgongan serliga ætlar at fara eftir fyritøkum, sum hava fingið tað at bera til, eitt nú alivinnan og pelagisku skipini.

Sagt verður nú, at uppskotið, sum er sent flokkunum til hoyringar, snýr seg um, at allar fyritøkur í Føroyum í 2011 skulu gjalda landskassanum 6% av rakstraryvirskotinum, altso fyri fíggjarpostar. Gjaldast skal, líkamikið hvussu stórar íløgurnar hava verið frammanundan, sum ávirka fíggjarpostarnar.

Vinnan er stúrin um framtíðina, um ein so greflig broyting verður smoygd niður yvir hana í einum og uttan samráðingar við vinnuna um uppskotið. Sagt verður, at eitt uppskot sum hetta fer at taka burtur allan íløguhug í Føroyum, og at hetta í ólukkumáta fer at skaða átakið fyri at fáa útlendskan kapital til landið.

Fólkaflokkurin hevur sagt seg at vera ímóti einum tilfeingisgjaldi av slíkum slag, tí bíðar vinnan spent eftir, um hetta nýggja gjaldi fer at síggjast aftur á fíggjarlógaruppskotinum, sum Jóannes Eidesgaard fer at leggja fyri tingið í næstum.

Hvørja støðu andstøðan á tingi hevur til uppskotið um tilfeingisgjald veit ongin enn, tí málið er so nýtt, og helst hava andstøðutinglimir ikki sæð uppskotið um hesi 6%.

Spennandi verður tó at vita, um Fólkaflokkurin tekur undir við gjaldinum, ella um tað hinvegin eydnast Jóannesi Eidesgaard at krøkja andstøðuna, í eini roynd at leggja fótonglar fyri vinnuna í Føroyum.

Aftur