Sørvingur stjóri í Sparikassanum

Norðoya Sparikassi hevur í morgun skift stjóra. Eyðfinn Reyðberg hevur sagt seg úr starvi, og Marner Mortensen er fyribils settur nýggjur stjóri. Marner Mortensen er 46 ára gamal, og hann hevur verið varastjóri í sparikassanum síðani 1. januar 1996. Marner Mortensen er útbúgvin civiløkonomur innan roknskap og fíggjarstýring.

Eyðfinn Reyðberg hevur verið stjóri í Norðoya Sparikassa síðani 1. mai í 2000. Í sambandi við, at hann leggur frá sær, sigur Eyðfinn Reyðberg:

“Eg havi nú verið stjóri í Norðoya Sparikassa í 10 ár, og hevði arbeitt í sparikassanum í meir enn 12 ár. Tí haldi eg, at mín tíð er komin at royna nakað annað, og at aðrar kreftir taka við. Vit hava í 2008 og 2009 havt tvey sera trupul og kravmikil ár, ið hava kravt ógvuliga nógv av øllum, sum varða av sparikassanum, men sparikassin hevur tað gott, og tað er tað, sum hevur størstan týdning. Eg eri sannførdur um, at sparikassin kemur styrktur burturúr hesi kreppu, sum í alheims høpi verður umtalað sum ein hundraðára kreppa. Við góðum og dugnaligum starvsfólkum ivist eg onga løtu í, at sparikassin eisini næstu mongu árini fer at verða ein týðandi peningastovnur í Føroyum.”

“Tá eg tók við sum stjóri fyri 10 árum síðani, arbeiddu 36 fólk í sparikassanum, og vit høvdu 6 deildir í Norðoyggjum og Leirvík. Í dag arbeiða 46 fólk í sparikassanum á 3 deildum, Klaksvík, Tórshavn og Saltangará. Útlán, innlán og javni eru hesi 10 árini trífaldað. Hetta setur stór krøv til starvsfólkini, og tað liva tey til fulnar upp til. Eginognin var við ársbyrjan 2000 167 mió.kr. Tá hon var hægst við árslok 2007 var hon tvífaldað til 337 mió.kr.”

“Eg vil í sambandi við, at eg leggi frá mær sum stjóri í Norðoya Sparikassa, nýta høvi at takka øllum kundum, ábyrgdarum, umboðsráði, nevnd, starvsfólki og samstarvspørtum annars fyri gott samstarv hesi seinastu 10 árini”, sigur Eyðfinn Reyðberg, stjóri at enda.

John P. Danielsen, nevndarformaður, takkar Eyðfinni Reyðberg fyri arbeiðið, sum hann hevur lagt í Norðoya Sparikassa, og hann ynskir Marner Mortensen blíðan byr í starvinum. 

Norðoya Sparikassi hevði í 2009 eitt hall áðrenn skatt uppá 46,2 mió.kr. móti einum halli uppá 63,2 mió.kr. í 2008. Eftir skatt gjørdist úrslitið í 2009 eitt hall uppá 38,0 mió.kr. í 2009 móti einum halli uppá 55,1 mió.kr. í 2008.

Høvuðsorsøkin til úrslitið er, at sparikassin í 2009 hevur staðfest eina versnandi gongd hjá fleiri kundum, ið hevur ført við sær øktar niðurskrivingar móti tapi uppá útlán og íløgum. Sparikassin hevur í 2009 framt niðurskrivingar uppá útlán uppá 45,4 mió.kr. ella eins nógv sum í 2008, tá niðurskrivingar uppá útlán vóru 45,1 mió.kr.

Aðrar orsøkir til hallið í 2009 eru m.a. gjald sparikassans vegna Bankapakka I, sum í 2009 var íalt 12,0 mió.kr. Harafturat hevur sparikassin staðfest eina niðurgongd í netto- rentu og kostnaðarinntøkum uppá 9,3 mió.kr. í 2009 tá samanborið verður við 2008.

Síggj roknskapin her

Aftur