Málið um Saksaberg hevur verið lýst her á Vágaportalinum eftir at tað kom fram, eisini í Sjónvarpinum, at óreglusemi hevur verið á feltinum, og eisini tí klagað var til Fiskiveiðieftirlitið um málið.

Nú roynur Pf. Vinnan at verja seg við - gjøgnum Ingolf Olsen, sjónvarpsmann og talurør -, at Saksaberg hevur fingið eitt tíðaravmarkað umskipingarloyvi frá Fiskimálaráðnum í 2002 viðvíkjandi svartkjafti, og fær tað at síggja út, sum er hetta loyvið galdandi í allar ævir viðvíkjandi øllum heimsins fiskasløgum.

Men hvørki Fiskiveiðieftirlitið ella Pf. Vinnan ella sjónvarpsmaðurin hava lisið svarið frá Fiskimálaráðnum, tí í svarinum stendur, at talan er IKKI um umskiping.

Henda tekst tekur sjónvarpsmaðurin ikki fram, men klípur bara tað úr svarinum, sum Vinnuni dámar at hoyra, og sjálvandi skal hann tað, tá ið hann er umborð á einum skipi hjá Vinnuni, og vit kunna bara ímynda okkum, hvat hent hevði, um sjónvarpsmaðurin las allan tekstin upp fyri opnum skíggja mitt úti á feltinum. Tá hevði Ingolf helst ligið millum hinar makrelarnar!

Sjónvarpið nevnir heldur einki um, at hetta er tíðaravmarkað umsókn. Sum tað stendur í umsóknini, so er hon galdandi fyri tíðarskeiðið 18. apríl - 31.desember 2002, tvs. eftir henda dato er tað ikki galdandi longur.

Sjónvarpið lesur heldur ikki tann tekstin upp frá Fiskimálaráðnum, sum sigur, at "Fiksimálastýrið er komið til ta niðurstøðu, at í hesum førinum er ikki talan um umskiping, men um kenda mannagongd at pumpa frá einum øðrum skipi ... Heldur kann hetta verða samanlíknað við tað, at nótaskip á t.d. makrelveiðu pumpar frá einum øðrum, sum ikki fær tikið alt kastið inn. Í slíkum førum verður tað skipið, sum pumpar frá hinum, skrásett at hava fiskað nøgdina, tað pumpar frá hinum".

Sjónvarpið, sum hevur fingið innlit í málið, eftir at Vágaportalurin tók málið upp og fekk innlit, hevur heldur ikki tikið nakað úr svarinum hjá fulltrúanum í Fiskiveiðieftirlitinum, har fulltrúin greitt sigur, hvat talan er um í hesum málinum, sjálv kjarnin í málinum, nevniliga, at nótaskip fiska felagskvotuna hjá ídnaðarskipi.

Tað er kjarnin í málinum, sum hvørki sjónvarpsmaðurin ella Fiskiveiðieftirlitið annars hevur skilt, men tað hevur fulltrúin í Fiskiveiðieftirlitinum gjørt sera greitt.

Fulltrúin skrivar soleiðis:

- Venda vit aftur til spurningin um nótaskip kunnu fiska av felagskvotuni hjá ídnaðarskipunum, er svarið nei.

- Felagskvota ella partur av hesi kann ikki latast øðrum at fiska. Felagskvota kann sambært løgtingslóg nr. 28 frá 10. mars 1994 ikki umsetast.

Hetta skriv má sjónvarpsmaðurin hjá Vinnuni eisini hava fingið innlit í, tí tað er sent uppaftur saman við innlitsumbønini hjá Vágaportalinum.

Góði Ingolf, hetta er sera greið tala.

Um tað ikki var greið tala, ja, so kundi t.d. Norðborg bara fiskað kvotuna hjá Safir og Smaragd og pumpa alt yvir í Smaragd og Safir, sum so avreiddu veiðina, ikki sannheit Ingolf!

Hví gera teir ikki tað, Ingolf?

Um so er at Ingolf Olsen, pr-maður hjá Vinnuni og sjónvarpsmaður, hevur rætt, ja, so eru tíðaravmarkaðar umsóknir galdandi allar tíðir, sjálvt um tær ikki eru gingnar á møti, tí ongastaðni í tekstinum hjá Fiskimálaráðnum stendur, at játtað verður nakað umskipingarloyvi.

Men nú bíða vit eftir svarinum frá Fiskimálaráðnum, sum hevur fingið málið aftur frá Fiskiveiðieftirlitinum.

Góði Ingolf, hvussu nógv fært tú í krónum frá Kringvarpinum fyri hasa sendingina í Degi og Viku í kvøld, sum beinleiðis var eitt forsvar og skuldi ætlast at reinsa Vinnuna?

ólavur

Les eisini:

Málið um Saksaberg er aftur í Fiskimálaráðnum

Aftur