'Paaal kom aaa maaal'

Treytirnar og upptøkan at sleppa at sita sum upplesari í Útvarpinum ella sum vertur eru, at tú hevur onkran sum starvast í Útvarpinum frammanundan.

Alt annað er líkamikið, um tú lesur gjøgnum nøs ella oyru ella munn ella rumparhol, er komplett líkamikið, bara tú kennir onkran í Útvarpinum, so kom inn!

Hetta er ikki ókent og hevur verið soleiðis í mong mong ár, tó fyrr var tað eftirnavnið sum var upptøkuprógvið at sleppa innum í Útvarpinum.

Vit skilja tað væl, at soleiðis er, og er hetta ikki nakað sum er einans kent í Útvarpinum, tí flestu arbeiðspláss eru soleiðis sett saman í Føroyum.

Hevur tú onga familju/vin, ja, so fært tú einki arbeiði.

Tú kanst eisini bólka tíðindini í Útvarpinum, alt eftir hvør vertur er: eru tað kvinnur, so eru bara reyðsokkatíðindi, og menn, so er tað restin!

Útvarpið hevði í kvøld tikið henda spurningin upp, um vit skulu lata upplesarar sleppa framat tíðindamikrofonini at lesa upp 'paaal kom aaa maaal' og 'okur digor rotnar fikor' og tað helt leiðslan.

Leiðslan grundgav tað við, at aðrastaðni, t.d. í DR í Danmark, var hetta praktiserað nú, men her má eg siga, at leiðslan ikki hoyrir nógv DR. Ongantíð enn havi eg hoyrt ein jyda ella vendelbúgva lesa upp í DR t.d..

Leiðslan førdi eisini fram, at øll skulu sleppa framat mikrofonini uttan mun til, hvaðani tey eru og hvussu tey tosað, men eg havi ongantíð enn hoyrt ein vágamann lisið upp í Útvarpinum og tað krevji eg sum gjaldari av kringvarpshaldinum, at ein vágamaður ella vágakvinna eisini sleppur at lesa upp sum vertur, antin í Útvarpinum ella í Sjónvarpinum.

Vit eiga minst líka nógv dugnalig fólk í Vágum sum eitt nú á Eiði!

Tá ið klaksvíkingar eiga einar 5 upplesarar/vertir og eiðisfólk einar 3, so krevji eg at eitt vágafólk - minst - sleppur framat mikrofonini.

Tað eru mangar ferðir fleiri vágafólk enn eiðisfólk, so nú krevji eg, at útvarpið ger nakað við hetta, so vit fáa javnvág í hesa grundgeving hjá leiðsluni um umboðan av dialektum.

Vit vilja hava ein drynjara framat mikrofonini sum skjótast!

Eftir orðunum frá hasum báðum umboðunum fyri leiðsluna í Kringvarpinum í kvøld at døma, er mær meira greitt, hví støðan er sum hon er í Kringvarpinum.

Leiðslan er ikki før fyri at skilja ímillum upplestur av høvuðstíðindum og túnatos.

ólavur

Aftur