Nú muga so teir klóku heilarnir grópa í paragraffum og lógum, tí sum skilst, er málið um makrelin hjá Saksaberg endað aftur í Fiskimálaráðnum.

Har verður tí fundast nakað, eftir at komið er úr eini gamlari skuffu eitt skriva frá 17. apríl 2002 sum hevur fína tittulin "Viðvíkjandi umskipingarloyvi til M/S Saksaberg FD 86".

Sambært innlitsumbøn, so hevur Vágaportalurin fingið hetta skjal, sum er viðvíkjandi umskiping av svartkjafti, og stendur soleiðis í skjalinum:

- Saksaberg hevur ætlanir um at føra svartkjaft frå størru nótabåtunum, sum fiska á føroysku landleiðini. Ætlanin er at pumpa beinleiðis úr trolposanum i tangarnar á Saksabergi. Veiðan skal landast til matna i Kollafirði (tó kann vera neyðugt at landa til ídnað í Fuglafirði, um góðskan av einihvørjari orsøk ikki er í lagi). Skipini gera avtalu sínámilIum um býtið av søluni.Ti verður við hesum søkt um umskipingarlovvi frå 18. apríl - 31.desember 2002 til hetta virksemi.

Skjalið er undirskrivað av fyristitingarleiðaranum fyri Pf. Miðalberg (M/S Saksaberg).

Fiskimálaráðið svarar reiðarínum soleiðis aftur í brævi tann 19. apríl 2002:

- Víst verður til skriv tykkara dagfest 17. apríl 2002, har søkt verður um loyvi til at m/s Saksaberg kann umskipa svartkjaft í føroyskum sjógvi frá øðrum størri svartkjaftatrolarum.

- Sum skilst, er her talan um, at m/s Saksaberg skal pumpa beinleiðis burtur úr posanum hjá øðrum skipum og avreiða í Føroyum. Sostatt er ikki talan um beinleiðis umskiping, sum vit t.d. kenna tað í sambandi við norðhavssild um summarið. Heldur kann hetta verða samanlíknað við tað, at nótaskip á t.d. makrelveiðu pumpar frá einum øðrum, sum ikki fær tikið alt kastið inn. Í slíkum førum verður tað skipið, sum pumpar frá hinum, skrásett at hava fiskað nøgdina, tað pumpar frá hinum.

- Fiksimálastýrið er komið til ta niðurstøðu, at í hesum førinum er ikki talan um umskiping, men um kenda mannagongd at pumpa frá einum øðrum skipi. Samsvarandi grein 32 í løgringslóg nr. 28 frá 10. mars 1994 um vinnuligan fiskiskap við seinni broytingum verður kravt, at veiðan fingin á henda hátt bert kann verða førd til avreiðingar í Føroyum. Samstundis er tað greitt, at tað verður m/s Saksaberg, sum skal fráboðað fiskiskapin, og skal á avreiðingarseðil verða skrásett sum tað skipið, ið hevur veitt fongin.

- Harumframt er treyt, at m/s Saksaberg hevur fiskiloyvi til svartkjaftaskip í føroyskum sjógvi. Undir viðgerðini av hesum málinum hevur Fiskimálastýrið staðfest, at m/s Saksaberg hevur veiðiloyvi til svartkjaftafiskiskap á ytru leiðini. Fiskiloyvi verður skrivað m/s Saksaberg ein av fyrstu døgunum, skrivar Fiskimálaráðið í aftursvari.

So nú kunna teir klóku heilarnir í Fiskimálaráðnum og Fiskiveiðieftirlitið kjakast um, hvørt henda umsókn um umskipingarloyvi hjá Saksabergi fyri tíðarskeiðið 18. apríl til 31. desembur 2002 er galdandi eisini í dag og í allar ævir, og eisini um svartkjaftur er sami fiskur sum makrelur, og eisini um ein felagskvota av makreli í 2010, er tað sama sum kvota av svartkjafti í 2002.

Vágaportalurin fylgir hesum spennandi máli ...

Les eisini:

Nótaskip kunnu ikki fiska av felagskvotuni hjá ídnaðarskipunum

Fiskimálaráharrin góðtekur ikki lógarbrot

Aftur