Langomman fødd á Víkum í Vágum

Tá ið íslendska pressan skrivar um Hans Lindberg, stóra og talentfulla hondbóltsleikaran, so er hann íslendingur, og tá ið danska pressan skrivar um hann, so er hann dani, men hann er reinur føroyingur.

Tað kom eitt sindur óvart á mong, tá ið Vágaportalurin skrivaði, at kendi hondbóltsleikarin Hans Lindberg, sum hevur sáttmála í Týsklandi og eisini spælir á danska landsliðnum, kanska fer at spæla í Barcelona - at hann er føroyingur.

Vágaportalurin skrivaði, at Hans Lindberg er trongisvágsmaður, tí bæði abbin og omman eru úr Trongisvági. Og Hans Lindberg er sonur Erling Lindberg.

Abbi kenda hondbóltsleikaran, Hans Lindberg, er føddur 5. august 1920 í Trongisvági, og var giftur við Atu Sørensen ættað av Húsgarði í Trongisvági, og fluttu tey bæði til Íslands, á Hafnafjørð. Hans Lindberg doyði 18. juli 1999 á Hafnafirði og er eisini grivin har.

Tey fingu dóttrina Valgerður Lindberg Hansdóttir og sonin Erling Lindberg, sum er pápi Hans Lindberg, landsliðsleikaran og stórtalentið. Hans Lindberg spælir júst nú í HSV Handball og við sínum 251 skoringum er hann toppskorari í Bundesligaini. Og hetta, umframt at hann spældi væl í Champions League, hevur ivaleyst vakt áhugan hjá spanska stórfelagnum Barcelona.

Við hjálp frá góðum ættargranskarum, m.a. Kára Thorsteinson og Hans Sørensen, sum Vágaportalurin hevur havt samskifti við, so hava vit fingið meira at vita um familjuna hjá Hans Lindberg og hvussu alt hongur saman við upprunanum.

Mamma gamla Hans Lindberg er ættað av Víkum, í Vágum.

Hon æt Hansina Hans-Christofffersen og var fødd 03.10.1895 og doyði í Tórshavn 03-10-1976. Hansina búði eisini í Húsgarði, og var gift við Andriasi Lindberg. Hann var nevndur Andrias á Beitinum.

Hansina var dóttir Ole Kristian Hans-Christoffersen, f. 18.11.1848 á Víkum og aftur sonur Hans Christoffer Olesen f. 29-09-1818 í Bø og Sara Sophie Danielsdatter f. 10.04.1822 í Sørvági.

Omma Hans Lindberg, Ala, er enn á lívi.

Hans Lindberg hevur eisini góðar hondbóltsrøtur í Vestmanna.

ólavur

Aftur