Landsverk og SEV undirskriva avtalu

Landsverk: SEV hevur tørv á at útbyggja, umleggja og leggja nýtt el-net í verandi og nýggjar vegir. Landsverk er landsvegamyndugleiki og skal tryggja teimum ferðandi tryggar og góðar umstøður á landsveganetinum. Í morgun hava Landsverk og SEV skrivað undir samstarvsavtalu, sum skal effektivisera hetta samstarvið ferðsluni og teimum ferðandi á landsvegunum at gagni, samstundis sum umsitingin verður effektivari og harvið bíligari.

Tey ferðandi á landsveganetinum skulu órógvast minst møguligt. Skulu nýggjar el-leiðingar, umvælingar og umleggingar av el-leiðingum gerast, skal hetta vera til minst møguligan ampa fyri tey ferðandi og fyri ferðslutrygdina á landsveganetinum. Tað er tí upplagt, at SEV og Landsverk saman arbeiða fyri, at slík inntriv í landsvegirnar verða avgreidd so skjótt og greitt, sum til ber.

- Neyðugt er við góðum og tøttum samstarvi stovnanna millum, soleiðis at tilfeingið í samfelagnum verður gagnnýtt á skilabestan hátt. Høvuðsendamálið við avtaluni er at fáa í lag eitt gott og skipað samstarv millum hesar báðar týðandi leikararnar í føroyska samfelagnum, sigur Hákun Djurhuus, stjóri á SEV.

Fyrrapartin í dag var ein samstarvsavtala millum SEV og Landsverk undirskrivað. Avtalan skal  tryggja, at partarnir kunna hvønn annan um framtíðar ætlanir, hava innlit í tíðarætlanir, krøv og annað hjá hvørjum øðrum, so hesar ætlanir ikki stoyta saman og óneyðug bíðitíð uppstendur. 

Í avtaluni stendur eisini, at fundir verða avtalaðir við jøvnum millumbilum at umrøða ætlanir og tilrættislegging av møguligum framtíðar arbeiðum hjá pørtunum.

Aftur