Hvussu var við Brimil-túrinum í Norra, George?

Fyrst skal eg siga, at um eitt blaðfólk er so lætt at mutra, at nakrir pinnamatar í Brússel taka alt journalistiskt meðvit frá tí, so átti tað at fingið sær eitt annað arbeiði.

Mutur er ikki nakað sum vit hava nógv av í Føroyum, ikki tað slag av mutri sum onnur og størri lond kenna til, so tað at yvirføra hetta á føroysk viðuirskifti, er ikki rætt.

Tað er altíð so lætt at kasta alla skuld á politikaran. Nú skal politikarin hava skuldina av, at ein dimmulingur/sjónvarpsmaður verður mutraður. Men er ikki okkurt ravruskandi galið við journalistinum, at hann verður mutraður?

Tað er mín hugsan, at tað altíð er ein spurningur um journalisturin kennir síni mørk og sínar uppgávur, tí politikarin - uttan mun - eisini teir sum halda seg vera so meinaleysir og fittir - roynir alla tíðina at fáa sín boðskap fram og hann brúkar øll snildir og einamest miðlarnar.

Hetta er ein støða sum eitt blaðfólk eigur at vita. Hetta er heldur ikki nøkur nýggj støða sum nú er íkomin, soleiðis hevur tað altíð verið.

Aktuella málið, at Uttanríkisráðið bjóðar tveimum journalistum til Brússel frá Kringvarpinum til tess at kunna okkum føroyingar um ymiskt har niðri í sambandi við bæði eitt og annað, og nú ein granskingarsáttmála, er einki mál hjá Dimmu at taka upp.

Journalisturin, George L. Petersen, sum skrivað hevur greinina og sum er farin at grópa í viðurskiftum hjá øllum, var sjálvur boðin til Norra, tá ið Brimil skuldi yvirtakast, og fekk alt goldið.

Hvat nú George L. Petersen?

Kringvarpið var eisini boðið við til Danmarkar herfyri, tá ið Vinnumálaráðið, Johan Dahl, var í Danmark, og tá gjørdi Dimma einki!

Hvat nú George L. Petersen?

Tá ið tú ert "súrur" um bara eitt ráð, og ikki "súrur" inn á eitt annað ráð, so er okkurt ikki rætt!

Nú luktar okkurt, George!

Eg hugsi at tað er skeivt av einum miðli sum Dimmalætting, at halda seg verða so reina, at hon ikki onkuntíð verður keypt til onkra uppgávu, tí tað verða allir miðlar alla tíðina.

Hygg bara Landssjúkrahúsið, George!

Nú hevur Landssjúkrahúsið allar starvslýsingar í Dimmu, og nú er friður, ikki sannheit.

Tá ið allar starvslýsingarnar vóru í Sosialinum, tá var alt Landssjúkrahúsið endavent av Dimmu, men so komu pengarnir, og so kom friðurin!

Í hesum tætta samfelagnum sum vit liva í, so er eitt sindur vandamikið at spæla ov "reinur" og "súrur"!

ólavur

Aftur