Heimurin hevur spurt eftir Jenisi

Tað er neyvan hent í føroysku tíðindasøguni áður, at ein grein er farin so víða og so skjótt sum viðmerkingin hjá Jenis av Rana í samrøðugrein á Vágaportalinum.

Fyrst vóru tað allir teir stóru miðlarnir í Íslandi, sum sjálvsagt er, sum vístu til greinina á Vágaportalinum, so kom Ekstrabladet við søguni í gjørkvøldið seint, uttan at nevna hvar hon var frá upprunaliga, og so fór søgan víðari til onnur ES-lond, m.a. Pólland og Ungarn, sum eru skrásett her á Vágaportalinum, umframt á Facebook har hon er viðmerkt og rikin runt sum tsunamisk alda.

Og á fleiri bloggum er hon eisini tugd og taglað og endavend og viðvend, og hava fleiri sæð sær ein møguleika við greinini sum undurstøði at komið sær fram sum pávar og talað føroya fólks vegna og søk.

Og Jenis av Rana hevur sitið allan dag við telduna og skrivað og svarað og tikið telefonina frá tíðindastovum, m.a. Ritzau og øðrum stórum bløðum sum brádliga fingu stóran áhuga í føroyska politikaranum, tí hann hevði eina meining.

Vágaportalurin spurdi Jenis, hvussu dagurin hevði verið í gjár, og sigur Jenis í stuttum skrivi til Vágaportalin, at hann hevur sitið og takkað og viðmerkt - alt positivar heilsanir - í fleiri tímar.

- Vinaumbønir í hópatali úr Íslandi og enntá ein viðmerking úr Póllandi, har viðkomandi hevði lisið greinina á eini tíðindasíðu har.

- Havi roynt at viðmerkt heilsanirnar úr Føroyum, men komi ikki útyvir tað, og eru tær allar positivar, skrivar Jenis av Rana í stuttari viðmerking eftir henda eitt sindur øðrvísi og buldraliga og tó spennandi dag, síðan stórur partur av Europa brádliga fekk slíkan áhuga í honum.

Jenis av Rana er eftir einum degi líka kendur runt um í Europa sum hálendski politikarin Geert Wilders frá Frælsisflokkinum.

Aftur