Fotoframsýningin bygdarlívið í Reykjavík

Tíðindaskriv: Leygardagin 31. juli 2010 letur Norræna Húsið í Reykjavík upp fotoframsýningina bygdarlívið eftir Randi Ward.

Myndirnar í bygdarlívinum eru tiknar í ymsum bygdum runt um í Føroyum. Ætlanin er, at tær skulu mæla ímóti tí romantisku umrøðuni, sum er vanlig hjá fólki, tá ið tey skulu lýsa Føroyar og føroysku bygdirnar – t.e. sum ævintýrakend støð, har ið tíðin stendur still, og øll liva í samljóði í utopiskum fjarskotni.

Framsýningin bygdarlívið sáar iva um hesa sjálvsøknu umrøðu, meðan hon samstundis finst at teimum niðurbrótandi eindum, sum eru í tí sosiala bygnaði og mátti, sum eyðkennir eitt samfelag. Í hvørji mynd í bygdarlívinum síggjast myndlig drøg av ovlýsing, forfalli  og órøkt, og hvør mynd er bygd upp soleiðis, at hon er á tremur við ørkymlandi symbolismu: gisnaðar hurðar, sum ikki longur kunnu latast upp, brotin ella fyrinegld vindeygu, upptærd hongsil og naglar og tekjur, sum reyð av rusti stríðast fyri at halda uppi skili, formi og virki.

Í bygdarlívinum er tann litfagra heildin og tað óslítandi sambandið millum ymisk sløg av fatanum, skipanum og afturgongd alla tíðina til staðar, men tey einastu fólkini, sum vit síggja á teimum innrammaðu myndunum, eru tey, ið skoða at myndunum… meðan teirra avskeplaða frásjónir og andlit verða varpað aftur til teirra til umhugsanar.

Fotoframsýningin varir til 21. August.
-----------------------------------------------------
Randi Ward er rithøvundur og fotografur fødd í 1982 í West Virginia, USA. Hon er MA í mentanarvísindum frá Fróðskaparsetri Føroya (2007) og hennara debut fotoyrkingasavn, meditations on salt, varð útgivið í Føroyum í oktober 2007. www.randiward.com

Aftur