Bussur endaði niðri í fjøruni

Ein av bussunum hjá felagnum á Giljanes, sum stóð parkeraður á Nesinum, er farin á rull í morgun og endaður niðri í fjøruni.

Sambært løgregluni, so hevur hon staðfest, at bremsurnar vóru ikki fyri, tá ið bussurin stóð niðri í fjøruni, tað vil siga, at bussurin er farin av rull av sær sjálvum.

Vágaportalurin hevur eisini tosað við Niels Joensen, sum eigur felagið sum hevur tveir bussar og vallaraheimið á Giljanesi, og hann sigur, at tá ið hann kom til bussin í morgun, so sá alt vanligt út.

- Klokkan 9.20 startaði eg bussin, tí eg skuldi brúka hann at koyra ferðafólk við í morgun, og lat hann standa ígongd, sum vanligt er. So fór eg inn á vallaraheimið, og tá ið eg kom út aftur, so var bussurin farin á rull.

- Tað vil siga innanfyri einar umleið 5 minuttir eftir, at hann er startaður, er bussurin bara farin á rull, og tað kann verða at ein hvirla hevur tikið í hann, so hann er farin, sigur Niels Joensen við Vágaportalin.

Bussurin var brúktur til koyring í gjárkvøldið, sambært Niels Joensen. Og hann metir ikki, at bussurin, sum er 19 ára gamal, verður gjørdur aftur, men tað er so ein spurningur sum Trygd fer at taka støðu til. Tryggingarfelagið Trygd hevur eisini verið á staðnum í morgun.

Vallaraheimið á Giljanesi verður væl vitjað og var juni mánaði ein góður mánaði, meðan august mánaði ikki var so góður, sigur Niels Joesen.

Myndir: Jógvan Helgi Hansen

Aftur