Aftur rok um Atlansflog

Mynd: Jógvan Helgi Hansen

Politiska toganin um Atlansflog heldur fram. Vágaportalurin hevur verið í arkivinum og hugt eftir gongdini seinastu árini, síðan Johan Dahl gjørdist landsstýrismaður.

Stutt áðrenn Johan Dahl gjørdist landsstýrismaður meldaði hann greitt út, at øll nevndin í Atlansflog skuldi skiftast út. Hetta uttan mun til, hvussu tað hevði gingist felagnum.

Stutt eftir gjørdist eisini rok um Atlansflog.

Meðan umboð fyri Atlansflog í november 2008 sótu á íleggjarafundi í Keypmannahavn, og royndu at gera felagið attraktivt fyri íleggjarar, boðaði landsstýrismaðurin frá, at hann ætlaði at keypa einskilda triðingin aftur í landskassan. Hette elvdi til mikið rumbul millum privatu partaeigararnar.

Uppundir aðalfundin í 2009 var aftur rok um felagið.

Landsstýrismaðurin fekk harða mótstøðu frá privatu partaeigarunum í sambandi við ætlan hansara at fremja broytingar í viðtøkum felagsins, sum m.a. høvdu við sær, at privatu partaeigararnir skuldu missa nevndarumboðanina, sum teir annars søgdu seg hava fingið lyfti um í desember 2007. Eisini ætlaði landsstýrismaðurin tá at koyra allar nevndarlimirnar frá.

Viðurskiftini høvdu við sær nógv fundarvirksemi, eisini millum landsstýrismannin og privatu partaeigararnar. Privatu partaeigararnir vóru í øðini, tí tað eftir teirra tykki var eingin ivi um, at landsstýrismaðurin við tiltøkum sínum einsamallur ætlaði at taka kontroll yvir felagnum. Landsstýrismaðurin tosaði hinvegin um at tryggja Føroyum farleiðirnar í útheimin, bæði á sjónum og loftvegis. Landsstýrismaðurin bað íleggjararnar ikki hava nakran ótta: ”trust me, i am a good bussinesman”.

Rokið uppundir aðalfundin í 2009 endaði við, at 2/3 av nevndini vóru skiftir út. Eftir fund við privatu partaeigararnar lovaði landsstýrismaðurin greiðar leiðreglur fyri val av nevndarlimum v.m. Hóast næstan tvey ár eru gingin síðani hetta lyftið var givið, eru ongar leiðreglur gjørdar.

Uppundir aðalfundin í 2010 var aftur rok um felagið.

Størsti privati partaeigarin ynskti viðurskiftini millum landsstýrið og privatu partaeigararnar viðgjørt á aðalfundinum. Partaeigarin var eisini í øðini um, at landsstýrismaðurin skifti einasta eftirverandi nenvdarlimin út við eina svenska kvinnu. Íslendski nevndarlimurin, sum var skiftur út hevði sitið í nevndini í mong ár og viðkomandi hevði drúgvar royndur innan loftferðslu annars.

Privati partaeigarin hótti í vár at úttaka stevning móti landsstýrinum, tí landsstýrið eftir hansara tykki als ikki hevur hildið tey lyftir, sum vóru givin tá fyrsti triðingurin av partapeninginum var seldur. Partaeigarin skuldsetti eisini landsstýrið fyri at hava útvegað sær eyka inntøkur við hægri gjøldum alt til stóran skaða fyri felagið og harvið eisini privatu partaeigararnar.

Fyrr í vikuni boðaði landssstýrismaðurin so aftur frá tiltøkum viðvíkjandi Atlansflog. Nú skal næsti triðingurin seljast. Verður hetta ikki samtykt, má løgtingið taka avgerð um at keypa partabrøvini aftur frá privatu partaeigarunum.

Løgmaður boðaði í gjáramorgunin frá á Vágaportalinum, at eingin avgerð er tikin um nakað sum helst viðvíkjandi Atlansflog og segði, at her fyriliggja helst nakrar misskiljingar.

Talvið millum landsstýrismannin og Atlansflog heldur fram.

ólavur

Aftur